www.mastoni.com
FUKUOKA KITARO
Mastoni ngrasani moderator Milis WOJOSETO
| Tetenger Nihonjin panjenengan Fukuoka Kitaro
kuwi apa ora kleru *Kintaro* ta Mbah? Fukuoka
jenenge kutha, lha Kintaro iki lho sing marahi
aku ngguyu dhewe kamikekelen bareng kelingan
sapa ta tokoh macho Kintaro iki. Ngene lho dulur, Kintaro kuwi wujude arupa boneka lugu (lucu tur gundhek), maksudku gothot methekel dedeg piyadege tur maneh untune, eh kleru ... rambute gondrong kaya rocker. Ah, sing wigati dudu Wojo-setone sing gondrong ya uwis lah ora dadi ngapa ben katon yen seniman empat sehat lima sambat. Kintaro tokoh sekti mandraguna, kapinterane olah kanuragan ngluwihi bintang sinetron laga ing tipi-tipi kae. Prasasat ora tau kalah, yen gelut karo sapa bae mesti menang, sok-sok menange dhewe, wong pancen dhengkal ora gelem ngalah. Menyang ngendi bae sing dicengkiwing mesti pethel. Aja cacak jalma manungsa lumrah, kabeh sato kewan wiwit saka gajah aboh beri-beri, singa galak jembrak, macan tutul-tutul sambel, nganti tuma mendem bosik, kabeh ora ana sing kumawani nyedhaki gepok senggol karo sing jenenge Kintaro iki. Kawruhana yen Kintaro iki satemene dudu jalma manungsa lumrah amarga asale mecethet saka woh-wohan aran peach. Kabeh samubarang sing mecethet kuwi lumrahe mesti mleseti. Slippery when wet. Mulane Ronggowarsito daden-daden pesen sing tansah ngati-ati maca harian Waspada. Kintaro iki wateke kasar, bisane dadi apik lan alus sawise diwedangi terus dibubuti, lho kepleset tenan ta ... maksudku sing dibubut kayune, lha wong bonekane pancen digawe saka kayu kok. Saben sasi Mei tanggale lali, awake dipamer-pamerna ing Festival Tanggono Sekku, kuwi lho festivale wong lanang-lanang thok (aja duwe panganggep sing ora-ora lho!). Nuwun sewu Mbah Soel, dak kira panjenengan luwih cocok nganggo tetenger Jidaifuzoku Ningyo ...ning yo ngono kuwi kudu dibancaki bubur sengkala dhisik ben ilang kabeh sengkalane awak. Lha yen Mas Suryo wis genah cocok nyandhang nganggo jeneng Hakata utawa Gosho Ningyo. Ningyo ngono kuwi ... nganti saiki bocahe isih uthek nggoleki "kasampurananing lan sejatining" font Hanacaraka, katanya dia lho, saya 'kan cuma ngopi tempel aja. Yen ora ana sing ngrewangi jarene Datasawalane arepe dipasrahna menyang pihak yang berwajib. Aku dhewe arep melu cawe-cawe wedi mengko diuneke jarene ora pareng ndhisiki kersane Gusti. Lho 'kan repot sarwa-sarwi ewuh pakewuh dadine embuh wis samene bae dhisik guyonane, lumayan kena kanggo tamba ilat gatel. mastoni.com |
