Periode Jaman gedhe mau siji-sijine kabagi meneh dadi Pitung Jaman Cilik utawa kang kasebut SAPTA MALOKO.
Trikali kabagi dadi telu yaiku :
- Kalisura (Jaman Alam Kaluhuran) suwene 700 Taun Surya.
- Kalijaga (Jaman Panguripan) suwene 700 Taun Surya.
- Kalisengoro (Jaman Ngalam Tirta) suwene 700 Taun Surya
Kalisengoro kabagi dadi Sapta Maloko, yaiku :
1. Kalajangga (Jaman Kembang Gadung)
2. Kalasekti (Jaman Kuasa)
3. Kalajaya (Jaman Hunggul)
4. Kalabendu (Jaman sengsara lan Angkaramurka)
5. Kalisuba (Jaman Kamulyan)
6. Kalisumbaga (Jaman Kasohor)
7. Kalisurata (Jaman Alus)
JAMAN KALABENDU
"...........Jaman Kalabendu dibukani goro-goro bumi gonjang-ganjing, gunung ketuk, goro molak malik, udan salah mangsa, kilat thathit liliwera, bandang (banjir), sumber-sumber padha sat, udan awor lahar, kali-kali pacethak, lemah gingsir, kudhunge wong para duraka, polahe kaya pari diinteri, pating biluhung lali sanak kadhang, bapa biyung lali anak, anak pangling wong tuwane, Kalabendu sabarang kang tinemu tansah ora enak kepenak, tetep jaman sikara, tukar padu cecongkrahan lan sadulure, padha rebut benere dhewe.
Wekasan goro-goro lamun Gunung Gni Merapi Krodha metu lahare, ditimbang gunung-gunung liyane, Oreging Gunung Slamet, Semeru, Brama, Kelud lan Gunung Kendheng, ing kono watesing jaman Kalabendu, entak-entakane Herucakra Hasmarakingkin, semune andamarwulan, Tanah jawa ambane kari saiyubing payung, sabab Bumine mingkup.
Kiyamat Kubra tansah arep numpes Tanah Jawa (Nuswantara /Indonesia) saisine, senajan sing diemaong narima, nanging sing momong ora narima, lan kudu arep ngentas saka Naraka Dunya kang sinandhang dening Herucakra Katelu pisan.
Mula banjur tekane babantu saka Nusa Tembini, kukulitane jenar (putih) dedeg jebol kepalang (Bangsa Jepang ?), iku bakal ngoboki Tanah Jawa (Indonesia), pangrehe mung saumure jagung suwene (3,5 wulan ?) nuli ditinggal mulih ing negarane dhewe ing Nusa Tembini.
Tanah Jawa (Indonesia) bali asale mring bangsane dhewe, naging sarana babanten (peperangan). Tekan ing kono wis entek jangkaningsun, sajroning 2100 taun lawase, kaliwat saka semono dudu bageaningsun, ing tembe ana dhewe kang duwe bagean kaya ingsun iki.
Tutupe jangka lan ingsun aweh wasita: Tebu sahuyun, ana wedhon (wanita) saka Lor Kulon (Barat Laut), akemul mori putih, ateken tebu wulung, wis batangen dhewe wasitaningsun. "
Ing jaman iki Tanah Jawa ana sak ngisore lambang utawa semboyan Ratu Hartawati, sasuwene jumeneng nata ing kaprajan kira-kira 33 taun candra utawa kasebut jaman drajad ratu. Ratu utawa Raja sing mikirke mung dhuwit lan Mas inten rajabrana wae. Akeh wong ing jaman iki lali karo prikamanungsan, peri kasusilan.
Sing digoleki mung dhuwit lan sak kabeh-kabehi diukur nganggo dhuwit. Sipate ing jaman iki rakus, serakah lan agah-agah. Imane gampang luluh lan limbung. Akeh wong sing sak wektu-wektu gampang panas amarga saka angkara murkane panguasa.
Ananging sajroning jaman iki bakal ana muncule Ratu Kembar , Hiku lire sesuguhe si Hajar marang ingsun (mangsa iku suguhane Pangageng kalawan rakyat cilik), yaiku arupi KEMBANG SERUNI, paribasane saka SERU lan WANI. Sapa sing wani ngendika lan pidato nganggo 1001 werna alasan sing muluk-muluk bakal oleh pengaruh gedhe.
Kampanye ngedol ngelmu, mung ngaku-aku atas nama Rakyat, njabane putih nanging njerone dadu. Ngakune suci, nanging sucine palsu. akeh bujuk akeh lojo. Mbok menawa wektu semana wis dadi kodrat ananing wolak-waliking jaman ing kalabendu. Tindake menungsa saya kuciwa. Banjur asring ana Grahana Srengenge, Grahana Bulan, Celeret (petir gedhe).
Ing pungkasan Kalabendu wiwitane Kalasuba utawa jaman kamulyan, tandane ana Ratu karo Ratu pasulayan lan anane paperangan gedhe utawa ontran-ontran. Ing wiwitan Kalasuba akeh wong wis lega atine, Ratune sing nyekel kaprajan yaiku: Ratu Ginaib Ratu (Presiden) sing ngutamake ketuhanan, prikamanungsan lan keadilan.
Raja kang kasebut uga Raja Hamisan, linuwih nama miskin, yaiku sing ora ngutamakake kamulyan lan kasugihan utawi kementerengan lair. Muncule Ratu iku ora nganggo syarat-syarat apa-apa. Tentrem, aman lan padang awit sing diutamaake mung tata tertib, keamanan lan katentreman Negara. Saka istanane ora ana keramaian lan kamulyan kanggo nyambut tekane. Tandha tekane yaiku yen kahanan wis pulih."Becik ketitik ala ketara" ora mung ning pitutur nanging wis dadi tumindake.
Sukma Kinaryo Buwono sing tegese keadilan lan kebijaksanaan wis tumimbal lair lan jengkar dadi Ratu Penandio. Mangkono kanggo penget maring para kita manungsa, dene ingkang pinasti iyo iku namung gadhahane Gusti Allah Ingkang Murbeng Dumadi.
