MEGATRUH,
HOWOS-HOWOS WOSE NGOWOS
 Mas Dwi nyerat:Lho .. malah lagi ngerti bilih mas Toni ugi nampi konsultasi soal jodho ...... he .. he ... he ... Mastoni:Pitaken kados makaten wau sampun asring sanget tumuju dhumateng kula. Saben dinten wonten kemawon ingkang nyuwun pirsa maneka warni, wiwit bab ingkang ngrembag perkawis ingkang "limrah" kadosta budhaya lan sastra Jawi, ngantos biro jodhoh, lowongan pendamelan, ngramal nasib, bumbu ndamel cabuk, dinten ingkang sae lan panggenan ingkang sefi-sefi kangge nyelamaken bapakne toha, lsp. Pun tah pokoke lucu-lucu. Sayang anak-sayang anak! Mas Dwi:Pripun kabare Surakarta Hadiningrat mas Toni ?! Mastoni:Sampun benten sanget manawi dipun bandhingaken kaliyan saderengipun kula gantos nami Buroningrat. Awit saking sampun dangunipun anggenipun nepusi jaman, mila lembaraning kabudhayan Jawi inggih dados bawera lan mawarni-warni, kalebet manungsa lan bebrayanipun. Ing kitha budhaya Solo mriki, teksih kathah ingkang kersa mbudidhaya ngrembakaken sampun ngantos singlar saking ancasing sedya nguri-uri kabudhayanipun piyambak. Kosokwangsulipun, para ingkang ndulit saperangan kemawon sampun rumaos alergi inggih ageng sanget gunggungipun. Ingkang tindhak-tandhukipun sok andlarung nuruti hardhaning karep ngantos kumawantun nerak wewaler ma-lima injih kathah sanget. Panjenengan sampun pirsa bilih Megatruh punika kepirengipun kemrutug howos-howos wose ngowos kados las-lasane beras ingkang medal saking mesin selepan. Lha mangga dipun cobi sesarengan sami nembangaken cakepan Megatruh: Sapa weruh tembang Jawa bakal luluh,Kamangka kridhaning karep sayekti anglangut tanpa tepi tebih saking pakeming urip sejati. Banjur pakeming urip sejati punika punapa? Embuh ora weruh, kula sanes manajer langit lan bumi, saged kula pancen namung ngopi tempel minus kredit candhak kulak. Sumangga sami dipun padosi piyambak-piyambak sarana ngudi lan marsudi pepadhanging urip ingkang tinemu ing piwulang agami lan piwulang sanesipun kados kaserat ing Dewa Ruci, Arjuna Sosrobahu, Gatholoco, Centhini, Darmagandhul, lsp. Owah gingsiripun kahanan ingkang kagerus dening ing mangsakala ugi saged dipun pirsani saking kathahipun bangunan enggal ngedhangkrang gagah kados ingkang jinejer ing Jl. Slamet Riyadi. Bangunan *tempo doeloe* kathah ingkang ketingal tansaya tuwik lan loyo, kawungkus rapet dening kenya setengah wuda cacahipun tiga tawa kapsul *penambah energi dan vitalitas*. Aku sing durung payu iki dadi rada blak-blak ser ngono lho ah. Horotoyoh dhalang lekoh maneh! Gek piye? Lalulintas ing Surakarta tansaya semrawut awit saking kathahipun jinising tetumpakan maneka rupa wujud, corek sarta merekipun ingkang tansaya damel ruweting sirah kula ngantos mlampah kemawon awrat sanget, kedah sangu pangati-ati, kuwanen lan kekendelan langkung-langkung manawi nedya badhe nyabrang. Wis ah, ngomonge mengko mundhak kedlarung-dlarung. Mas Dwiyatno:Mas Toni, matur nuwun seratanipun. Inggih kula namung nderek remen jumurung parandene seratan mas Toni sampun nyengkok Solo ingkang handadosaken kagok kegeling manah dupi mrayitnani bilih Basa Jawi kawula taksih semrawut-karung buntut. Mugi para pinisepuh ingkang sampun limpad trep ing basa, kasdu paring pepeling mbok mbilih atur kula wonten kecer-cewetipun. Seratan andika (biyuh ... ?!) Sekar Megatruh punika ngemutaken kula mas Karebet numpak gethek disurung bajul kawan ndasa. Tiyang punika apalan Megatruh kula wiwit cilik alit durung wanuh dhuwit. Megatruh ing jaman punika kok ya nggreges yen ditembangake.
Mastoni:Hiii medeni ... lha kok akeh banget ta ya bajule nganti 40 cacahe. Kepriye ta ya karepe Mas Karebet kuwi, wurung berupacairan ... eh kleru, berpacaran karo Nini Ratu Mas Cempaka banjur nekad milih disurung bajul, malah mutung ora gelem ketemu jalma manungsa. Dhasar Karebet anake Ki Kebo Kenanga sing dipateni kok ya Kebo-ndanu, padha kebone! Saumpama ketemu Mbah Soel mesti bakal ditakoni, "Apa bedane kebo ambek manungsa?" Jawabane takona wong Dhayak lan Medura. Mas Dwi:Liburan kala wingi kula inggih klintong-klintong dumatheng Klewer-jokeng punapa. Rekake golek kaset VCD Didi Kempot sing asli, nanging karo bakule malah kon tuku sing palsu wae .... wong asli karo palsu ora ana bedane. Bareng tak dhedhes, pokoke kula pengin tumbas sing asli, lha rak ngaku bilih bakule mboten kagungan sing asli ....... wis ngono meksa, neng ora gelem sing palsu ya wis kana 'kapracondang' saka kene. We lha, lha wong arep tuku barang sing sah miturut hukum, lha kok malah kaningaya awak mami. Kepentog ing atur, palsu ya ben, wong regane ya murah tur kualitase padha, perkara negara rugi ..... ya dudu salah mami. Pripun punika, wong arep tumindhak apik wae, kok ya rekasa nemen. Jan-jane sak margi-margi ya karo tolah-toleh mbok manawa mrangguli priyantun bagus njatmikani-sing lagi nunggu midodari-sinambi camilan srabi- naminipun mbok manawi .... mas Toni (menika sembranan lho mas Toni) . Well, no luck, lha wong kutha sagedhene Solo-napa malih sing jenenge Klewer niku wonge maewu-ewu, kabeh gaweyane dol tinuku, gek ya sing didol ki apa, sing dituku ki apa, seprana-seprene kok ya ora entek-entek. Wangsul dumatheng Serat Megatruh punika, wadhuh bareng tak semak mak tratab kula mas Toni. Apa ya tenan kabudayan jawa arep angemasi ?! Rikala sonten kala wau, ugi kapacak wonten suaramerdeka.com, ngarsa dalem Sultan Hamengku Buwono X ugi paring pangandika "Peradaban Kita nyaris hilang", wah tambah nggrantes jroning tyas. Gek aja-aja ora mung Jawa sing angemasi, nanging ...Indonesia ?! Kala wingi angsal forward tragedi Sampit, nuwun sewu, fotonipun priyantun kakung-putri-anak-anak ingkang dipun tigas jangganipun, nuwun sewu malih, mustakanipun di jejer neng meja, gembung gumlundhung, gek foto sak pirang-pirang nyebar neng internet ...... gumun kula, apa ya pancen dha wis sakit jiwa tha ya ?! wong photo kaya ngono, sing jelas-jelas bertentangan karo budhaya kamanungsan ngono kok ya disebar-sebarna. Gek ya paedahe apa ?! Mbuh piye dadine negara iki, suwe-suwe ora pemimpine-ora rakyate, padha-padha gendhenge. Wonten tembang Durma punika "paman-paman, apa wartane ing ndalan ?!, ing ndalan akeh pepati, dipun kaningaya, sinuduk pedang ligan, ing njaja terusing gigir, akari raga, badhan kari ngalinting", lho namung menika rak namung bedhekan thok ora tenanan. Lha Sampit punika real sing nggegirisi ..... terus apa bedane uwong ambek menungsa ?! (Lho malah takon ?! mas Fuku, nuwun sewu). Mastoni:Ing ngandhap punika wonten guritan seratanipun Mas Tedja Kusumo, ungelipun makaten:
|
Lintang-lintang sami surem sorotipun kadosdene
kenyaring sasangka rudatos angemu susah nora
uwis-uwis anggone kasangsaya urip ing Baita
Nuswantara. 