www.mastoni.com
TEH CELUP
Mastoni
| Kringetku krasa kerih-kerih anget tumetes
ndromos bar mlaku kepanasan turut ndalan
nyoba golek kamar penginepan sing murah-murah
bae tinimbang katon gumlethak klimprak-klimpruk
kaya gombal amoh ing terminal bis Tirtonadi.
Dhasar wisnu kere kaya aku, senadyan penginepane rada apek-apek sithik ya ben no problem I can put up with Moroseneng, sing penting panggonane minus panti pijet sing satemene luwih pantes nganggo tetenger panti ulah rasa, rasaning driji-driji sing wiwit mau tansah ngawe-awe ngajak nyawiji. Adate sing nganggo serpis kaya ngene iki saka kadohan gandane wis beda, genah iki ora becik kanggoku apamaneh aku isih lajang. Kesebelasan iman pasti bisa bertahan satu kosong, sing ora kuwat iki bapakne toha sing gawane babarpisan pancen ora sabaran. Wetengku wis mulai krasa kriwik-kriwik sedina mung kisenan keluke rokok karo kopi sak gelas. Bar ngombe kopi ing terminal wetengku langsung klempoken wong kopine mung sak imit banyune akehe kaya bar nguras segara kidul. Nedya golek isine wadhuk, aku mandheg ing ngarepe Warung Sederhana. Jenenge karo kahanan warunge pancen gathuk, embuh maneh yen bar maem terus kena thuthuk regane sing pranyata ora kena diarani sederhana, lha ora ana daftar rega panganane, dadi ya mung beja-beji. Ngersakaken dhahar menapa, Mas? pitakone sing adol sega. Wonten sekul napa mawon?aku ganti takon. Soto ayam nggih wonten, menawi ngersakaken sekul rames napa opor ayam nggih mangga. Mangga pinarak, Mas. Sing adol sega wonge ayu cecet-cuwet nyumanggakna karo lambene minca-mincu, kalah Mustakaweni. Sontoloyo mawon Mbak, eh klentu, soto ayam mawon, panjalukku. Nggih …kok mboten nate ketingal, Mase menika saking pundi lan ajenge kesah teng pundi kok mbeta tas giedhi banget kaya wong purik? Anu Mbak … kula menika saking nJombang, lha kula menika pancen ajenge minggat diuber-uber tagihan kreditan sepeda motor Mbak. Abot-abote nguber gengsi, kula wani-wani pados kreditan sepeda, sak niki ngelu dhewe sirahku mikirna cicilane ora entek-entek. Inggih, menika saestu. Sampun pinten taun niku …dugi sepriki teksih dereng lunas-lunas, duka nggih … kula menika mboten ngertos itungane. Wis pokoke ruwet Mbak. Ah, Mase ki ana-ana wae. Mase wau nitih sepeda montor ta ngriki? Mboten, wong sepedae sampun amblas kula sade. Napa saestu niku, …sampun ngoten ah! Dipun rantos sekedhap nggih mas, sotone ajenge kula panasi riyin. Mbake sing adol sega banjur mecethat mak nyet mlebu menyang pawon nyumet kompore. Ooo … Mase menika saking nJombang ta? Tebih nggih? Kula kinten namung celak ngriki mawon. Kula nggih nggadhah sedherek wonten Denanyar. Bis nJombang Solo sak menika pinten, Mas? Sangang ewu, Mbak. Wah … mindhake kathah nggih. Kula riyin ngrika namung nem ewu limang atus. Mase menika asmane sinten ta? Njenengan menika lucu ketingal radi cemlondho ning sumeh. Sumeh mboten ateges mesum tur njuweweh ta? Nami kula Agus, agak gugup sedikit, lha lho sing adol sega wonge ayu. Ah, empun ngoten ah, marake kula isyen. Mengko gek wis duwe bodzo. Wong lanang ki biasya … selalu mengambil kesempatan dalam kesempitan. Lha menika pancen sing enak lho Mbak. Saya memang selalu menunggu kapan ada kesempatan berada dalam kesempitan. Ah, Mase iki lho … aja njarak ….mentas wae kenal kok wis wani gegojegan. Sampun nggadhah yuga pinten Mas? Dereng. Kula dereng pajeng kok, radi kasep nggih? Lha Mbake sampun gadhah momongan pinten? Kula menika teksih senggel Mas. Teng nggriya mawon, mboten nate medal, ajrih mangke saged disrengeni ibu kaliyan bapak. Paling banter nggih teng warung mriki menawi sonten, menawi injing nggih ibu kula ingkang wonten mriki. Dados tiyang estri menika angel Mas, wanita menika jarene kudu wani ditata. Ooo…ngaten ta. Lha menawi priya menika tegesipun napa? Duka nggih, kula mboten ngertos. Nanging menawi "lanang" kula ngertos tegesipun. Napa? Yen lagi mancal aja nganti konangan! Menawi konangan malem minggon kliwat saka jam rolas saged ditangkep dikawinke ngenggon. Dikawinke ngenggon rak malah sekeca ta Mbak, mboten sisah repot-repot pados penginepan. Kula malah remen menika. Paket hemat akhir pekan. Menawi dinikahaken ngenggon menika kula ingkang radi was-was. Lha menawi mboten remen, rak mesake anake mbesuk. Anu, Mbak … sotone mlajeng teng pundi, kula enteni koq mboten muncul-muncul ngantos weteng kula kothekan lho! Oh, nggih Mas ngapunten ngantos kesupen kula. …………………….…………………………….. Mangga, menika sotonipun. Minume napa Mas? Teh mawon Mbak. Ngangge es napa mboten? Es krim napa esek-esek? Nggih mboten ta Mas, wong teh kok dicampur es krim, pripun ta Mase iki. Es batu Mas …ngangge es batu. Mboten Mbak, mangke menawi disukani es batu mundhak katosen tehe. Wong es koq ana watune, pripun ta Mbake iki. Mase iki ana-ana wae. Kandhane sing adol sega karo nyawiske tehe. ………………………..………………….. Lho, Mbak!…. niki tehe teh celup ta, amit-amit jabang bayiiii, kok mboten sanjang riyin ta Mbaaaak….!!!??? Nggih Mas, …. wonten napa? Kula mboten kolu ngombe tehe Mbak. Lha kenging napa …. napa kenclokan laler? Dicuthik mawon beres Mas, dijarne teng mriku malah sae nambah protein hewani ..hii...hiii! Mboten ngoten Mbak, teh biasa mawon enten napa mboten? Kula mboten doyan ngombe teh celup. Kelingan sing ora-ora. Kelingan napa Mas? Niku lho Mbak kelingan talang bocor! Wujudipun memper pembalut. Tehe sing biasa mawon Mbak, mboten usah dipun balut, bocor nggih kersane! Malah sae saged dibeta teng pameran lukisan abstrak! |
