www.mastoni.com
WONG AYU WONG AYU
Mastoni
| Binarung swaraning pradangga hangrangin hambabar
Ketawang Puspawarna, wonten ganda hangambar
arum Le Feu d'Issey katiyu bing samirana
manda, kawistara jengkaring wong ayu lencir
kuning bokong zzz…zhemok bahenol montol-montol
mijil saking tepas wangi, tepas mengku werdi
papan wangi wus hangarani ateges mijil saking
Sari Kemayu Beauty Salon. Lembehane mblarak sempal nedya tindhak terminal Blok M kang eM-e wus diblok mandheg greg!--hanggarbini suwene watara rong sasi sawise kawin siri senadyan satemene sirikan kawin luwih seneng kumpul kebo, sapi, jaran lan bangsa sato kewan liyane mung amerga saka wedi nora kersa diarani wong ndesit. Jemek-jemek gulane Jawa, aja ngenyek padha kanca. Wong ayu wong ayu, sira hangagem busana ingkang sarwa retna hangemba busananing garwa simpenan pejabat nekat Kabyuk paten-pinaten Boyolali lali marang beboyo. Dhuh wong ayu, busana sira katon pating galebyar pating pancurat ngedab-ngedabi lamun kasaru sunaring lampu-lampu merkuri. Hangagem puspita rinonce by La Roche-Posay ing ukelira, sinampiran wonten ing pamidhangan kanan, lamun katiyuban samirana manda kongas gandane hangebegi wisma palereman. Endah edining busana batik Iwan Tirta hamimbuhi gandes luwes solah bawane, lamunta cinandra ical sipating janma sawantah pun yayah Bethari-a-Sonata tumurun mak krusek bleg! ... ambyuk ing simbar dhadha ireng ketel kang ketele lan irenge kaya rekening sira ing BCA--Bank Capek Antre, Bank Cubluk Administrasine. Nedya buka rekening nitip dhuwit mayuta-yuta cacahe ing BCA Solo nanging nora tinampan nganggo Paspor, kudu nganggo KTP! Kamangka aku wus nape manggon ing mancanegari ora nate gepok senggol karo kang aran KTP. Wajik kletik gulane Jawa, luwih becik sing prasaja. Wong ayu wong ayu, badhe nyebataken sinten ta asma panjenengan punika kula teksih ewuh pakewuh, awit kula dereng nyumurubi punapa panjenengan piyambak sampun pirsa punapa ta tegesipun 'asma' punika. Manawi dereng, keparenga kula aturi pirsa bilih asma punika asalipun saking tembung 'asal manunggal'. Hewandene werdhinipun inggih punika asal-usulipun kita sadaya punika inggih saking 'manunggaling bapa lan biyung'. Minangka wohing manunggal, lajeng 'mbrojol, lahir, utawi ana'. Pramila punika tanpa manunggal rumiyin boten bakal tumukul tetenger 'asma'. Saben tiyang punika kagungan asma, senadyan boten sadaya saged mangertosi asmanipun piyambak. Miturut Romo Shakespeare, asma punika boten wigatos, apalah artinya sebuah nama. Tumraping tiyang Jawi asma punika wigatos sanget kedah dipun mangertosi maksud suraosipun, amargi asma punika ngiket budi pakerti. Minangka tuladha kula 'Toni' ateges waton muni tur yen ditonton bisa medeni nanging yen ditolak bakal ngangeni, horotoyoh! Semanten ugi Mbah Landa, manawi alane boten manda-manda punika ateges boten runtut kaliyan asmanipun. Nyuwun sewu Mbah. Balung klapa, Mbah Landa ethok-ethok ora ngerti yen disapa. Kowe iki durung pecus kaselak besus, dijapri ngono ya ben. Menter, jare wong Jombang. Sekar aren mastoni.com, sampun dangu-dangu angsalipun nggedabrus kementhus. Roning mlinjo, inggih kula pancen sampun sayah nyuwun ngaso. Hambokbilih wonten kiranging trapsila, suba sita miwah kiranging basa tuwin sastra karana budi dhayaning manungsa kirang sampurna manawi boten dipun jejeli rokok Sampoerna, mawantu-wantu nyuwun lubering pangaksama. |
